Metro Manila, ₱60 nga umento sa sweldo epektibo na karong Setyembre 26

Makadawat og ₱60 nga dugang sa adlaw-adlaw nga sweldo ang gibana-banang 1.1 milyon ka minimum wage earners sa National Capital Region (NCR) sugod karong Sabado, Setyembre 26, human opisyal nga miepekto ang Wage Order No. NCR-28.

Gipahibalo kini ni Department of Labor and Employment (DOLE) Secretary Francis Tolentino niadtong Sabado sa ilang central office sa Intramuros, Manila, atol sa paglunsad sa TUPAD-based nga "Trabahong-Dagat and Blue Enterprise Development" project.

Ang TUPAD (Tulong Panghanapbuhay sa Ating Disadvantaged/Displaced Workers) usa ka community-based emergency employment program.

“Here we have shown the significance of a tripartite mechanism where the government, the employers' groups and the employees' groups are united to promote and elevate the dignity of the Filipino worker and also show that with this unity, we can promote a sustainable economy here in the NCR," matod ni Tolentino.

Ubos sa wage order, mosaka gikan sa ₱695 ngadto sa ₱755 kada adlaw ang minimum wage sa mga trabahante sa non-agricultural sector sa NCR.

Mosaka usab gikan sa ₱658 ngadto sa ₱718 kada adlaw ang minimum wage sa mga trabahante sa agrikultura, gagmayng retail ug service establishments nga adunay 15 o mas gamay nga trabahante, ug gagmayng manufacturing establishments nga kasagarang adunay ubos sa 10 ka trabahante.

Giawhag ni Tolentino ang mga employer nga hugot nga mosunod sa bag-ong minimum wage rates ug sigurohon nga maapil ang gitakdang umento sa ilang payroll ug compensation systems.

Matod ni Tolentino, padayon nga bantayan sa DOLE ang pagsunod sa wage order ug maghatag og giya sa mga trabahante ug employer bahin sa hustong pagpatuman niini.

Ang wage order miagi sa gitakdang tripartite wage-setting process nga gihimo sa Regional Tripartite Wages and Productivity Board-NCR ug gikompirma sa National Wages and Productivity Commission.

-Ato ni Bai