Marcos Gikonsiderar ang Pakigtambayayong sa Singapore sa Nuclear Energy

Gipahayag ni President Ferdinand R. Marcos Jr. niadtong Sabado nga bukas siya sa posibleng pakigtambayayong sa Singapore bahin sa nuclear energy isip kabahin sa paningkamot sa iyang administrasyon nga mapalig-on ang seguridad sa suplay sa enerhiya sa Pilipinas.

Gihisgutan ni Marcos ang iyang mga plano atol sa pagbisita sa Singapore Nuclear Research and Safety Institute (SNRSI) sa Singapore.

“As our economy grows, so does our need for reliable, affordable and cleaner energy,” matod niya sa usa ka Facebook post.

“During my visit to the Singapore Nuclear Research and Safety Institute, we explored opportunities for cooperation in nuclear science, research and safety as we study nuclear power as a possible long-term energy source for the Philippines,” dugang ni Marcos.

Gipasiugda niya ang panginahanglan nga mangita og laing tinubdan sa enerhiya aron matubag ang nagkadakong panginahanglan sa kuryente sa nasod.

Gihatagan usab niya og gibug-aton ang pagsiguro nga adunay kasaligan ug barato nga suplay sa kuryente ang mga pamilyang Pilipino ug mga negosyo.

“Our goal is to secure an energy future where Filipino families and businesses have access to sufficient, affordable and dependable electricity, with safety remaining our highest priority,” matod niya.

Gipasiugda ni Marcos nga adunay potensyal ang nuclear energy nga makatabang sa pagdugang sa suplay sa kuryente sa nasod ug pagpaubos sa bayranan niini.

Matod niya, anaa na ang Pilipinas sa unang duha ka hugna sa pagpangandam alang sa paggamit sa nuclear energy. Gihisgutan usab niya nga andam ang mga Pilipino sa paggamit niini isip tinubdan sa kuryente.

Miingon si Marcos nga adunay mga propesyonal ang Pilipinas nga makatabang sa nuclear energy program, ilabina tungod sa kasinatian sa nasod sa mga proyekto sa nuclear power niadtong dekada 1980.

Ang SNRSI mao ang pangunang institusyon sa Singapore alang sa panukiduki sa nuclear science ug safety. Lakip sa mga gitun-an niini ang kaluwasan sa nuclear reactors, pagkaylap sa radioactive substances, radiochemistry, radiobiology ug nuclear policy.

Gisuroy ni Marcos ang mga laboratoryo sa institusyon ug gipatin-awan sa ilang mga buluhaton sa radiochemistry, radiobiology ug pagsusi sa kaluwasan sa nuclear energy.

Gitukod ang SNRSI niadtong 2014 ubos sa Nuclear Safety Research and Education Programme aron mapalig-on ang kahibalo ug kapasidad sa Singapore sa nuclear safety, science ug engineering. -Ato ni Bai