Mangga sa Pilipinas gitan-aw nga mahimong pagkaon sa umaabot nga space missions

Gipahayag sa Department of Science and Technology (DOST) niadtong Biyernes nga susihon niini ang mga paagi aron mahimong kabahin ang Philippine carabao mango sa umaabot nga mga eksplorasyon sa kawanangan.

"We’re taking the carabao mango and exploring how it can be part of the Filipino story in space," matod ni Gina Abrera sa DOST-Philippine Nuclear Research Institute (PNRI) ug project leader sa Philippine Space Mango Program, sumala sa usa ka news release.

Matod ni Abrera, gusto sa project team nga makahimo og "a product that can travel far, represent our identity, and remind future astronauts of home.”

Sumala sa DOST, tumong sa Pilipinas nga makapadala sa unang Filipino astronaut ngadto sa kawanangan sa 2035. Tungod niini, matod ni Abrera, magkinahanglan ang maong astronaut og pagkaon nga makapahinumdom kaniya sa iyang yutang natawhan.

Samtang, gipahayag sa DOST nga ang maong inisyatiba usa ka panagtambayayong sa PNRI, University of the Philippines-Diliman, Philippine Space Agency, ug Batangas Mango High Value Growers Agriculture Cooperative.

Pinaagi sa ilang panagtambayayong, susihon nila kon unsaon paghimo sa carabao mango nga usa ka produktong pagkaon nga angay alang sa dugay nga mga misyon sa kawanangan.

Dugang sa DOST, tumong usab sa programa nga susihon ang mga solusyon sa pagkaon alang sa mga emerhensiya ug mga sitwasyon sa pagresponde sa kalamidad.

-Ato ni Bai