Macron gusto ipatuman sa EU ang social media ban sa mga ubos sa 15 anyos

Nanawagan si French President Emmanuel Macron sa European Commission nga suportahan ang pagdili sa social media alang sa mga batang ubos sa 15 anyos sa tibuok European Union (EU), human wala madayon ang susamang balaod sa France, sumala sa iyang opisina niadtong Martes.

Sa sulat ngadto kang European Commission President Ursula von der Leyen niadtong Agosto 29, miingon si Macron nga kinahanglan nang maghimo og bag-ong balaod ang EU aron parehas nga ipatuman sa tanang miyembrong nasud ang pagdili.

Gipagawas ang panawagan human gibasura sa Constitutional Council sa France karong ting-init ang national bill nga unta ipatuman sugod Setyembre.

“I believe it has now become essential to go further and, through a new European legislative text, harmonise a ban on access to social media platforms for children under the age of 15, in order to protect all children across the Union,” matod ni Macron.

Human gipasa sa Australia niaging tuig ang pagdili sa social media alang sa mga bata, pipila ka nasud sa Europe ang naghunahuna usab og susamang restriksyon tungod sa kabalaka sa epekto sa social media sa mental health ug kaluwasan sa mga batan-on.

Apan adunay mga nasud, ilabi na sa Scandinavia, nga nagtuo nga ang mga ginikanan ang angay magbuot kon tugotan ba ang ilang mga anak sa paggamit sa social media.

Gihimo ni Macron nga prayoridad ang maong isyu sa iyang kataposang tuig isip presidente sa France sa dili pa ang presidential election sa 2027. Nangayo usab siya og suporta gikan sa ubang gobyerno sa EU alang sa mas hugot nga restriksyon.

Miingon si Macron nga usbon usab sa France ang balaod nga gibasura sa Constitutional Council, apan mahimong malisod ang pagpasa niini tungod sa pagkabahinbahin sa parliament ug lisod nga budget negotiations.

Miingon si von der Leyen niadtong Hulyo nga molihok ang EU aron limitahan ang paggamit sa social media sa gagmayng bata sa 27 ka miyembrong nasud.

Ubos sa usa sa mga gisugyot nga pamaagi, limitado ug ubos sa pagdumala sa ginikanan ang paggamit sa social media sa mga batang ubos sa 13 anyos, ug anam-anam nga pagluagan ang mga restriksyon samtang magkadako sila.

Apan mas hugot ang gustong ipatuman ni Macron, diin hingpit nga dili tugotan ang paggamit sa social media hangtod moabot sa 15 anyos. -Ato ni Bai