Kim Jong Un nag-awhag sa pagpalig-on sa drone technology ug paggamit sa AI sa militar
Nanawagan si North Korean leader Kim Jong Un nga makab-ot sa iyang nasod ang "absolute superiority" sa drone technology atol sa iyang pagtambong sa usa ka exhibition ug demonstration sa unmanned aeronautical technology, sumala sa report sa state media nga KCNA niadtong Biyernes.
Reuters / Joyce Lee, Heejin Kim ug Jack Kim; Gihubad ni Herli Mae Virador / Ato ni Bai
October 31, 2026 at 11:06:58 AM

Nanawagan si North Korean leader Kim Jong Un nga makab-ot sa iyang nasod ang "absolute superiority" sa drone technology atol sa iyang pagtambong sa usa ka exhibition ug demonstration sa unmanned aeronautical technology, sumala sa report sa state media nga KCNA niadtong Biyernes.
Gipakita sa firepower demonstration ang tactical suicide attack drones, tactical cruise missiles, multipurpose drones, ug 600mm multiple rocket launchers, sumala sa KCNA.
Gipakita sa maong demonstration ang paningkamot ni Kim nga i-modernize ang armadong pwersa sa North Korea pinaagi sa paggamit sa mga drone ug artificial intelligence (AI), samtang nagkuha ang Pyongyang og mga leksiyon gikan sa gubat sa Russia batok sa Ukraine ug uban pang mga panagbangi sa kalibotan.
Nahitabo kini taliwala sa nagkataas nga tensiyon tali sa duha ka Korea, diin misaad ang Seoul nga lig-on nga motubag sa giingon nitong mga paglapas sa North Korea, samtang gikondena sa Pyongyang ang hiniusang air defense drills sa South Korea ug US.
Gipakita sa mga hulagway sa KCNA ang mga unmanned aerial vehicle nga adunay simbolo sa North Korean Air Force atol sa exhibition nga gitambongan ni Kim.
Sa ubang mga hulagway, makita ang usa ka unmanned aerial vehicle nga daw mibangga sa usa ka military vehicle ug mibuto nga adunay dakong kalayo atol sa weapons demonstration.
Mipahayag ang militar sa South Korea niadtong Huwebes nga nagpabuto ang North Korea og mga 10 ka projectile, lakip ang short-range ballistic missiles.
Matod ni Kim, ang pagkab-ot sa labaw nga katakos sa drone technology usa ka "an indispensable option" tungod sa nag-usab nga kinaiya sa modernong pakiggubat, sumala sa KCNA.
Miingon usab siya nga ang paggamit sa high-level AI sa unmanned weapons systems kinahanglan nga mahimong pangunang prayoridad sa North Korea, sumala sa report sa KCNA.
Balik-balik nang nanawagan si Kim sa pagpalambo sa mga drone ug military AI.
Sumala sa state media, gimandoan ni Kim ang mass production sa suicide attack drones niadtong Nobyembre 2024, gidumala ang mga pagsulay sa mga bersiyon niini nga adunay AI niadtong Marso 2025, ug niadtong Septiyembre 2025, gihimong pangunang prayoridad ang AI sa pag-modernize sa mga armas.
MGA LEKSIYON GIKAN SA GUBAT SA UKRAINE
Sukad Oktubre 2024, nagpadala ang North Korea og kapin sa 16,000 ka personnel ngadto sa Russia aron tabangan ang Moscow sa gubat niini batok sa Ukraine. Nakakuha usab sila og kasinatian sa aktuwal nga panagsangka nga naglakip sa drone warfare, electronic warfare, ug combined-arms warfare, sumala sa South Korean intelligence.
Matod ni Lim Eul-chul, usa ka propesor sa Kyungnam University sa South Korea, ginabag-o sa North Korea ang militar niini pinaagi sa paggamit sa mga drone ug AI, base sa mga leksiyon gikan sa mga gubat sa Ukraine ug Middle East.
Pinaagi sa pagpakita sa nagkalainlaing klase sa armas, naningkamot ang North Korea nga "shut off the possibility of dialogue or negotiations" uban sa South Korea, matod ni Lim.
Gipakita usab sa North Korean state media sa unang higayon ang gihulagway sa mga analyst nga usa ka tailless, flying-wing stealth drone.
Gipakita sa mga hulagway ang mga han-ay sa gagmay nga suicide drone ug loitering munitions nga susama sa US Switchblade 600. Sumala sa mga analyst, nagpakita kini nga gipunting sa North Korea ang barato ug dinaghan nga produksiyon sa mga armas, nga posibleng nakuha gikan sa mga leksiyon sa gubat sa Ukraine.
Matod sa mga analyst, ang mga mock target nga susama sa South Korean K9 howitzers, M1 Abrams-type tanks, ug radar vehicles nagpakita nga ang mga armas posibleng gituyo nga gamiton batok sa mga pwersa sa South Korea ug US.
TENSIYON SA BORDER
Mipahayag si South Korean national security adviser Wi Sung-lac niadtong Biyernes nga lig-on nga motubag ang South Korea aron panalipdan ang military border, bisan pa sa pag-angkon sa Pyongyang nga nagpahigayon lamang kini og mga operasyon sulod sa kaugalingong teritoryo.
Sa laing bahin, mipahayag ang Defense Ministry sa North Korea nga ang air defense drills sa US ug South Korea nagpasamot sa tensiyon sa Korean Peninsula ug nga "no limit" ang mga kapilian niini aron mapadayon ang lig-on nga katakos sa pagpugong sa mga hulga, sumala sa KCNA.
Misamot ang tensiyon sukad sa pagbuto sa usa ka landmine sulod sa Demilitarized Zone niadtong miaging bulan, nga nakaangol pag-ayo sa pipila ka sundalo sa South Korea. Matod sa Seoul, ang pagbuto gipahinabo sa usa ka landmine sa North Korea, apan gilimod kini sa Pyongyang.
Mipahayag si Kim Yo Jong, ang impluwensiyadong igsoong babaye ni Kim, sa sayong bahin karong bulana nga i-activate sa North Korea ang mga anti-South Korean propaganda loudspeaker sa tibuok utlanan niini sa dili pa matapos ang Oktubre.
Nagpalupad ang usa ka military drone nga adunay AI atol sa usa ka test operation, nga nagpakita sa abanteng abilidad niini sa pag-operate nga awtomatiko alang sa surveillance, reconnaissance, ug mga misyon nga nagkinahanglan og tukmang pagtarget.
Frederick Shaw / Unsplash pinaagi sa Wix
%20(100%20x%20100%20px).png)