Huyang nga Peso, Tensiyon sa US-Iran Nagpabug-at sa PH Stock Market

Miubos ang local stock market niadtong Miyerkules tungod sa nagkahuyang nga peso ug geopolitical tensions tali sa United States ug Iran.

Mikahuyang pa ang peso ngadto sa 61.81 batok sa U.S. dollar gikan sa 61.78 sa pagsira sa trading niadtong Martes.

Gipasangil ni Rizal Commercial Banking Corporation (RCBC) chief economist Michael Ricafort ang pagkahuyang sa peso, sa bahin, sa mga kalamboan sa US-Iran peace discussions.

Miingon siya nga nahitabo kini human mipahibalo si US President Donald Trump nga walay giplanong pakig-istorya uban sa Islamic Republic of Iran, human natapos ang US-Iran memorandum of understanding niadtong Aug. 17, 2026.

Midugang si Ricafort nga nagpabiling duol sa pinakataas nga lebel sulod sa tulo ka semana ang presyo sa crude oil sa international market samtang naghulat ang mga merkado sa posibleng wala pa mahitabo kaniadto nga US economic sanctions batok sa Iran, ilabi na kay wala gihapoy bag-ong peace deals nga nakab-ot.

Nag-abli ang peso sa 61.85, mas huyang kaysa 61.63 nga pagsugod niini sa miaging trading session.

Nagbalhin-balhin kini tali sa 61.99 ug 61.73, nga nagdala sa average niini sa maong adlaw ngadto sa 61.86.

Miabot sa USD1.89 billion ang trading volume, gikan sa USD1.34 billion sa miaging adlaw.

Tungod sa pagkahuyang sa peso, mibalik sa pag-ubos ang main index sa local stock market, nga mikunhod og 1.70 percent ngadto sa 6,158.34 points, samtang miubos og 1.29 percent ngadto sa 3,396.35 points ang All Shares index.

“The weaker currency weighed on market sentiment, while broad-based selling reflected continued investor caution. Global market weakness also weighed on sentiment, adding to the pressure on local equities,” matod ni Luis Limlingan, Regina Capital Development Corporation head of sales.

Nagtapos nga miubos ang tanang sectoral indices, nga pinakadako ang pag-ubos sa Services sa 2.68 percent.

Gisundan kini sa Mining and Oil nga miubos og 2.60 percent; Industrial, 1.64 percent; Holding Firms, 1.33 percent; Financials, 1.07 percent; ug Property, 0.08 percent.

Mikunhod ang trading volume ngadto sa 843.72 million shares nga nagkantidad og PHP5.78 billion.

Mas daghan ang shares nga miubos kaysa misaka, 119 batok sa 74, samtang 54 ka shares ang nagpabiling walay kausaban.