Germany, nagplano og depensa batok sa drone, cyberattack ug sabotahe

Nagplano ang Germany og dagkong mga lakang aron palig-onon ang depensa niini batok sa mga pag-atake sa drone, cyberattack ug uban pang matang sa sabotahe sa Russia human sa napakyas nga pag-atake sa drone sa usa ka airport niadtong miaging bulan, sumala sa taho sa Bild am Sonntag newspaper niadtong Domingo.

Matod ni Interior Minister Alexander Dobrindt sa maong mantalaan nga nahimo nang bahin sa adlaw-adlaw nga realidad ang nagkalain-laing matang sa pag-atake sa Russia. “These attacks will increase, but we can defend and protect ourselves,” matod niya.

Dugay nang gisalikway sa Russia ang mga alegasyon nga nagpahigayon kini og mga operasyon sa Western Europe ug gipanghimakak ang kalambigitan niini sa pag-atake sa airport sa Germany. Matod niini, motubag kini sa gitawag sa tigpamaba sa foreign ministry niini nga “anti-Russian action”.

Sumala sa taho sa mantalaan niadtong Domingo, nga nagkutlo sa German interior ministry, palapdan ubos sa plano ang katakos sa kapulisan sa pagdepensa batok sa mga drone. Magbutang usab og mga yunit nga dali mapadala sa nagkalain-laing siyudad aron panalipdan ang kahanginan ibabaw sa importanteng mga sentro sa transportasyon ug mga distrito sa gobyerno.

Hatagan usab og legal nga katungod ang mga kompanyang nagdumala sa importanteng imprastraktura, sama sa mga kompanya sa kuryente ug mga tiggama og kagamitan alang sa depensa, nga dili lamang makamatikod sa mga drone kondili mahimo usab silang aktibong mopugong niini.

Magtukod usab og nasudnong sistema sa panalipod, o “cyberdome”, nga adunay network sa mga digital sensor aron makamatikod ug makapugong sa mga pagsulay sa hacking.

Plano usab sa gobyerno nga palapdan ang paggamit sa mga teknolohiyang gisuportahan sa artificial intelligence (AI), biometric facial recognition ug video surveillance sa mga lugar sama sa mga estasyon sa tren, aron mailhan ang mga suspetsadong nag-andam og sabotahe.

Wala dayon motubag ang interior ministry sa email nga nangayo og komento bahin sa taho. -Ato ni Bai