Excise tax sa LPG ug kerosene, temporaryong gisuspenso

Gimando ni President Ferdinand R. Marcos Jr. niadtong Biyernes ang pagsuspenso sa excise tax sa liquefied petroleum gas (LPG) ug kerosene pinaagi sa Executive Order (EO) 125, human sa pagsaka sa presyo sa gasolina ug uban pang produktong petrolyo.

Ubos sa EO 125, hingpit nga gisuspenso ang excise tax sa LPG, gawas kon gamiton kini isip hilaw nga materyales sa paghimo og petrochemical products o isip sugnod sa pagpadagan sa mga makina. Gisuspenso usab ang excise tax sa kerosene, gawas kon gamiton kini isip aviation fuel.

Gipagawas ang maong mando human irekomendar sa Development Budget Coordination Committee (DBCC) ang temporaryong pagsuspenso o pagpaubos sa excise tax sa mga produktong petrolyo.

Gihimo sa DBCC ang rekomendasyon human magpagawas ang Department of Energy (DOE) og opisyal nga sertipikasyon nga ang aberids nga presyo sa Dubai crude oil sulod sa usa ka bulan, gikan Agosto 13 hangtod Setyembre 11, miabot sa USD99.41 kada baril. Mas taas kini sa USD80 kada baril nga gitakda ubos sa Republic Act (RA) No. 12316 isip basehan sa posibleng pagsuspenso o pagpaubos sa fuel taxes.

Gimando sa EO 125 ang DBCC, sa pakigtambayayong sa DOE, nga repasohon ang pagpatuman sa pagsuspenso sa excise tax ug magsumite og report ngadto sa House of Representatives (HOR) ug Senado, sumala sa RA No. 12316.

Gitakda usab sa EO nga awtomatikong ibalik ang excise tax rates usa ka semana human mokunhod sa ubos sa USD80 kada baril ang aberids nga presyo sa Dubai crude oil sulod sa usa ka bulan, base sa sertipikasyon sa DOE, o sa dihang matapos ang tulo ka bulan nga suspensyon.

“Based on these reports, the DBCC may recommend to the President the continuation, modification, extension, or termination of said suspension,” sumala sa mando.

“The excise tax rates on petroleum products shall automatically revert to the rates prescribed under Section 148 of the NIRC, as amended, without need of further issuance."

Gimandoan usab ang DOE ug Department of Finance (DOF), pinaagi sa Bureau of Internal Revenue (BIR) ug Bureau of Customs (BOC), nga maghimo og imbentaryo sa kasamtangang suplay sa LPG ug kerosene ug sigurohon ang pagsunod sa bag-ong mando.

Gimandoan usab ang BIR ug BOC nga magsumite kada bulan sa House of Representatives og impormasyon bahin sa gideklarang kantidad ug gidaghanon sa mga produktong petrolyo nga sakop sa EO 125.

Sumala sa EO, kinahanglang obligahon sa DOE ang mga kompanya sa lana nga magsumite kada bulan og impormasyon bahin sa mga gasto nga naglangkob sa presyo sa mga produktong petrolyo nga sakop sa mando samtang gisuspenso ang buhis.

Moepekto dayon ang EO 125 sa higayon nga mamantala kini sa Official Gazette o sa usa ka mantalaan nga adunay halapad nga sirkulasyon.

Ubos sa RA No. 12316, mahimong suspindihon o ipaubos sa Presidente ang excise tax sa pipila ka produktong petrolyo, base sa rekomendasyon sa DBCC ug sa pakigtambayayong sa DOE, kon ang aberids nga presyo sa Dubai crude oil sulod sa usa ka bulan moabot o molapas sa USD80 kada baril.

Mahimong ipatuman ang maong tax relief sulod sa labing taas nga tulo ka bulan.

Niadtong Abril, gigamit ni Marcos ang iyang awtoridad sa pagsuspenso sa excise tax sa LPG ug kerosene sulod sa tulo ka bulan, human sa rekomendasyon sa DBCC.

-Ato ni Bai