Europe, misulod sa lumba sa paglusad og satellite human nakaabot sa kawanangan ang German rocket

Gilunsad niadtong Sabado sa German startup nga Isar Aerospace ang una nitong rocket ngadto sa kawanangan gikan sa usa ka lugar sa Arctic Norway, nga nagpalapit sa Europe sa tumong niini nga makalunsad og mga satellite gikan mismo sa kaugalingong teritoryo.

Ang Spectrum rocket, nga walay sakay nga tawo, mao ang unang commercial flight gikan sa continental Europe nga nakaabot sa orbit, samtang daghang nasud sa rehiyon ang gustong makakuha og bahin sa nagkadakong merkado sa mga misyon sa kawanangan.

“We’re in orbit! And just made European history,” matod sa Isar sa usa ka post sa social media platform nga X.

Usa kini ka dakong kalamboan alang sa industriya sa Europe sa paglusad og mga rocket, nga naghatag sa rehiyon og mas maayong access sa kawanangan, matod ni Norway’s Minister of Industry and Commerce Cecilie Myrseth sa usa ka pahayag.

“The fact that we can now launch satellites from Andoeya strengthens Norwegian and European security in the turbulent times we live in,” matod ni Myrseth.

EUROPE, GUSTONG MAS DILI MAGSALIG SA UBANG NASUD

Mibisita si German Chancellor Friedrich Merz sa launch site sa Isar niadtong Marso, nga nagpakita sa paningkamot sa Europe nga mahimong mas dili magsalig sa ubang nasud samtang nag-usab ang global order nga kaniadto gipangulohan sa United States ubos kang U.S. President Donald Trump.

Gilunsad gikan sa Andoeya Spaceport sa Arctic Norway ang Spectrum, nga walay sakay nga tawo ug gihimo aron makadala og gagmay ug kasarangang karga. Nagdala kini og lima ka gagmay nga satellite ug usa ka eksperimento sa teknolohiya nga gihimo atol sa paglupad, sumala sa Isar.

Ikaduhang paglunsad kini sa Isar, 18 ka bulan human nahulog sa dagat ug mibuto ang unang rocket sa kompanya wala madugay human kini gilunsad gikan sa samang lugar. Walay nasamdan niadtong higayona.

Bisan pa niini, gikonsiderar sa kompanya nga malampuson ang paglunsad niadtong Marso 2025 tungod sa daghang datos nga nakuha niini alang sa mga naghimo sa rocket, matod sa kompanya niadtong panahona.

Ang paglunsad niadtong Sabado gituyo isip “both the vehicle’s qualification mission and its first flight carrying payload,” matod kaniadto sa kompanyang nakabase sa Bavaria.

Lakip sa dagkong kompanya sa tibuok kalibotan nga naglunsad og mga satellite ang SpaceX ni Elon Musk, nga naglunsad gikan sa United States, ug ang French ArianeGroup, usa ka joint venture sa Airbus ug Safran nga naggamit og spaceport sa French Guiana sa South America.

Ang SpaceX, usa ka kompanya nga nagnegosyo sa mga rocket, satellite ug AI, gilista sa Nasdaq exchange niadtong Hunyo pinaagi sa usa ka record initial public offering.

Ang Esrange launch site sa Sweden ug SaxaVord Spaceport sa Britain, nga nahimutang sa Scottish Shetland Islands, maoy labing duol nga mga karibal sa Norwegian site. Tanan niini nagtumong nga mahimong mas dili magsalig ang Europe sa ubang nasud alang sa mga paglupad ngadto sa kawanangan.

Gipahibalo sa Isar niadtong miaging semana nga nakakuha kini og mga €200 milyon ($232 milyon) gikan sa European Space Agency aron motabang sa paggasto sa paghimo og bag-ong mga rocket ug pagpalapad sa mga pasilidad niini alang sa pagsulay ug paglunsad.

Naghimo usab ang German company og ikaduhang launch site sa Canada. -Ato ni Bai