EU nagplano og pagdili sa social media, AI chatbots sa ubos 15 anyos

Mosugyot ang European Union og pagdili sa mga ubos sa 15 anyos sa paggamit sa social media, video-sharing platforms, AI chatbots ug online games, nga maoy pinakalapad nga plano niini hangtod karon aron mapanalipdan ang mga bata gikan sa mga peligro online, base sa dokumento sa European Commission nga nakita sa Reuters.

Misamot sa tibuok kalibotan ang kabalaka bahin sa epekto sa dagkong online platforms sa panglawas ug kaluwasan sa mga bata, lakip ang Facebook ug Instagram sa Meta, TikTok, YouTube sa Google ug ChatGPT.

Kabahin ang sugyot sa EU sa EU Kids Act nga ipresentar ni European Commission President Ursula von der Leyen ug EU tech chief Henna Virkkunen niadtong Huwebes. Posibleng ipahibalo ni Ursula von der Leyen ang pipila ka detalye niini sa iyang State of the Union address bahin sa umaabot nga mga polisiya sa EU niadtong Miyerkules.

"The Union's approach should allow minors to benefit from the huge potential of digital services, while protecting them from abuse and exploitation. It needs to limit the access of tech companies to our children, and not the other way around," matod sa dokumento.

Gitugotan sa sugyot sa Commission, nga maglakip usab sa video gaming platforms, ang anam-anam nga paggamit sa nagkalainlaing serbisyo depende sa edad. Ang mga kinahanglan sundon sa mga kompanya magdepende sa matang sa serbisyo ug edad sa mga bata.

Wala mokomento ang Commission.

COMPANIES WOULD HAVE TO PAY A SUPERVISORY FEE

Sumala sa dokumento, kinahanglan mobayad ang mga kompanya og supervisory fee aron pondohan ang pagpatuman ug pagdumala sa mga regulator.

Ubos sa sugyot, ang mga bata nga 15 anyos pataas mahimong maghimo sa ilang kaugalingong accounts, samtang ang mga bata nga 13 hangtod 14 anyos mahimong mangayo sa ilang mga ginikanan nga maghimo og introductory accounts alang sa social media ug video-sharing platforms nga ubos sa parental control, limitado ang mga makontak ug adunay hugot nga limitasyon sa oras sa paggamit.

Ang accounts sa mga bata nga 3 hangtod 12 anyos hingpit nga kontrolado sa mga ginikanan ug para lamang sa child-friendly services nga adunay hugot nga mga lagda sa kaluwasan, matod sa dokumento. Ang mga ubos sa 3 anyos dili tugotan nga mogamit sa maong mga serbisyo.

Posible pa nga mausab ang mga detalye sa dili pa kini ipahibalo.

Kinahanglan pang hisgotan sa Commission ang draft uban sa mga nasod sa EU ug European Parliament sa umaabot nga mga bulan sa dili pa kini mahimong balaod.

Gilatid sa draft nga nakita sa Reuters ang mga kinahanglan sundon sa mga kompanya, lakip ang paglikay sa mga disenyo nga mahimong makaadik ug harmful feeds.

Kinahanglan usab silang maghatag og mga himan aron dali nga makareport ang mga bata og harmful content ug epektibong parental control tools.

Kinahanglan susihon sa social media ug video-sharing platforms ang edad sa mga bata sa dihang maghimo ang usa ka user og bag-ong account, samtang kinahanglan susihon sa online gaming platforms ang edad sa mga bata sa dili pa sila maka-download og games.

Matod sa mga kompanya, naghimo sila og mga lakang alang sa kaluwasan, ug daghan kanila ang nagtakda og minimum nga edad nga labing menos 13 anyos aron makahimo og account sa social media platforms.

-Ato ni Bai