DOTr ug Australia naghisgot og kooperasyon sa mga proyekto sa transportasyon

Gihisgutan sa Department of Transportation (DOTr) ug gobyerno sa Australia ang posibleng kooperasyon aron mapaayo ug ma-modernize ang railway, airport, ug seaport infrastructure sa Pilipinas.

Nagkita niadtong Martes si Acting Transportation Secretary Giovanni Lopez ug Australian Ambassador to the Philippines Marc Innes-Brown sa DOTr main office sa Mandaluyong City aron hisgutan ang posibleng pagpamuhunan sa dagkong transport projects sa nasud, sumala sa DOTr niadtong Miyerkules.

Gihisgutan ni Lopez ang mga railway project sama sa Metro Manila Subway Project, North-South Commuter Railway System, MRT-7, MRT-3 upgrade and expansion, LRT-1 Cavite Extension Project, ug Philippine Automated Fare Collection System.

“This is the kind of partnership that would help close the gaps in the transport sector. President [Ferdinand R.] Marcos, Jr. has said sustained partnership with other countries will help improve the daily commute of our countrymen,” matod ni Lopez.

Giduso usab sa DOTr ang modernisasyon sa mga regional airport, lakip ang Laguindingan Airport, Bohol-Panglao International Airport, Iloilo International Airport, Puerto Princesa International Airport, Laoag International Airport, Busuanga Airport, Bacolod-Silay International Airport, Tacloban Airport, General Santos International Airport, ug Siargao Airport.

Gipasiugda usab ni Lopez ang mga proyekto sa transportasyon sa kalsada sama sa EDSA Busway, Taguig City Integrated Terminal Exchange, active transport project, ug Navotas Feeder Line Project, nga ikonektar sa EDSA Busway.

Gipaningkamotan usab sa DOTr ang modernisasyon ug pagpaayo sa mga pantalan sa tibuok nasud aron mas mapalambo ang koneksyon tali sa mga isla ug mas paspas ang pagbiyahe sa mga tawo ug pagdala sa mga produkto ug serbisyo.

Sa iyang bahin, mipahayag si Innes-Brown og suporta sa mga proyekto, nga matod niya makatabang aron mahimong mas kasaligan ang public transport ug mas sayon ang adlaw-adlaw nga pagbiyahe sa mga Pilipino.

“The Philippines has ambitious plans for infrastructure, energy and economic development. We want to see more Australian investors bringing capital and expertise to help turn those ambitions into reality,” matod ni Innes-Brown.

Kauban ni Innes-Brown sa miting ang mga opisyal sa Australian infrastructure firm nga Plenary Group. -Ato ni Bai