Bureau of Immigration paspasan ang paghatag og bodycams sa airport officers

Gipaspasan sa Bureau of Immigration (BI) ang paghatag og body-worn cameras nga adunay voice-recording capability sa tanang officers nga naka-assign sa mga airport isip kabahin sa mga lakang aron mapalig-on ang accountability, transparency ug monitoring sa immigration operations.

Matod ni BI Commissioner Joel Anthony Viado, target nilang mahatagan og bodycams ang ilang airport officers sa katapusan sa Oktubre.

“This is not only about documenting our officers’ transactions. The body-worn cameras will strengthen accountability, transparency, and monitoring, and serve as a deterrent against any personnel who may attempt to abuse their position,” matod ni Viado sa usa ka news release niadtong Biyernes.

Gihimo ang maong lakang samtang padayon ang internal investigation sa pagsulay sa pagbiya sa nasod sa usa ka posibleng biktima sa human trafficking ug illegal recruitment sa Ninoy Aquino International Airport Terminal 1 sa Parañaque City niadtong Setyembre 12.

Gitapos sa Bureau of Immigration ang serbisyo sa usa ka job order employee ug gitangtang sa airport assignments ang duha ka immigration officers, diin ang usa kanila gidakop sa National Bureau of Investigation (NBI).

Matod ni Viado, lahi ang administrative actions sa pagtino kung adunay criminal liability, nga magdepende sa findings sa NBI.

Tinoon usab sa imbestigasyon kung kinsa ang mitabang o miatiman sa pasahero gikan sa iyang pagsulod sa terminal hangtod nakaabot siya sa immigration area, lakip kung adunay personnel nga posibleng mitabang aron ma-clear siya sa immigration.

Gisusi usab sa Bureau of Immigration kung adunay ubang airport personnel, lakip ang gikan sa ubang stakeholders, nga posibleng nalambigit o adunay nahibaloan bahin sa mga kahimtang sa insidente.

“We need to establish the complete timeline of the incident and identify everyone who may have had contact with or assisted the passenger inside the terminal. Given the circumstances, our investigation cannot be limited to what happened at the immigration counter alone,” matod sa BI chief.

“We will not allow the wrongdoing of a few to undermine the hard-earned accomplishments and credibility of the Bureau. I strongly warn all BI personnel: Do not abuse your position and do not engage in illegal activities. We will take firm action against anyone found to have violated the law or abused their authority.”

-Ato ni Bai