Australian investors, nangitag oportunidad sa enerhiya sa Pilipinas

Nagplano ang upat ka dagkong institutional investors sa Australia nga susihon ang bag-ong investment opportunities sa energy, infrastructure ug ubang importanteng sektor sa Pilipinas, matod sa Australian Embassy sa Manila niadtong Martes.

Miingon ang embahada nga ang senior representatives gikan sa AustralianSuper, IFM Investors, Macquarie Asset Management, Pentagreen Capital ug Plenary Group—nga adunay hiniusang AUD1.4 trillion nga assets under management—magpahigayon og business mission sa Manila gikan Setyembre 8 hangtod 9.

Miingon si Australian Ambassador to the Philippines Marc Innes-Brown nga kabahin ang pagbisita sa mas lapad nga investment strategy sa Canberra sa Southeast Asia, nga nagtumong nga mapadaghan pag-ayo ang Australian investments sa Pilipinas.

“The Philippines has ambitious plans for infrastructure, energy and economic development. We want to see more Australian investors bringing capital and expertise to help turn those ambitions into reality,” matod niya.

“The visit takes place during the 80th anniversary year of Australia-Philippines diplomatic relations, and we are looking towards an even more substantial economic relationship.”

Miingon ang embahada nga makigkita ang delegasyon sa mga lider sa negosyo sa Pilipinas, senior government officials ug mga nagdumala sa dagkong proyekto. Susihon usab nila ang investment opportunities nga mahimong mabuksan tungod sa pagpalapad sa infrastructure ug pagbalhin sa nasud ngadto sa mas limpyo nga mga tinubdan sa energy.

Ang mga investors, lakip ang mga gisuportahan pinaagi sa AUD2 billion Southeast Asia Investment Financing Facility sa Australian Government, adunay dakong kasinatian sa tibuok kalibotan sa pagpondo, pagpalambo ug pagdumala sa dagkong infrastructure, energy ug strategic assets, ingon man dakong kapital alang sa long-term investments.

-Ato Ni Bai