AFASA, nakapalig-on sa pagsumpo sa online scam — BSP

Gi-report sa Bangko Sentral ng Pilipinas (BSP) nga dako ang natabang sa Anti-Financial Account Scamming Act (AFASA) sa pagpalig-on sa abilidad sa gobyerno sa pag-imbestiga, pagsubay, ug pagpasaka og kaso batok sa online nga pagpanglimbong sa panalapi.

Gipasiugda ni BSP General Counsel Roberto L. Figueroa ang epekto sa balaod atol sa hearing sa Senate Committee on Finance bahin sa gisugyot nga 2027 national budget, isip tubag sa gihangyo ni Senator Mark A. Villar nga update bahin sa kalamboan sa pagpatuman niini.

Si Villar, ang principal author ug sponsor sa AFASA ug chair sa Senate Committee on Banks, Financial Institutions and Currencies, nangutana kon nakapauswag ba ang balaod sa pag-ila sa mga scammer ug pagpasaka og kaso batok kanila.

“Bilang principal author at sponsor ng AFASA, nais nating malaman kung paano nakatulong ang batas sa pagpapatibay ng enforcement laban sa online scams at kung mas marami na ba tayong nahuhuli at napapanagot na scammers,” matod ni Villar.

Gipasiugda ni Figueroa ang pagtukod sa Consumer Account Protection Office (CAPO) ubos sa AFASA isip usa ka dakong kalamboan, nga naghatag sa BSP og lig-on nga paagi aron direktang maatubang ang malimbongong mga transaksiyon sa panalapi.

Gipakita sa datos atol sa briefing nga nakatala ang Philippine National Police Anti-Cybercrime Group og 527 ka kaso nga may kalabotan sa AFASA niadtong 2025, diin 447 ang nasulbad o na-clear na.

Namatikdan usab sa mga awtoridad ang pagkunhod sa mga insidente sa online scam atol sa unang katunga sa 2026, nga giingon ni Figueroa nga sa usa ka bahin tungod sa mas taas nga kahibalo sa publiko.

Lakip sa mga importanteng aksiyon sa pagpatuman sa balaod, gihisgutan ni Figueroa ang pagdakop sa National Bureau of Investigation niadtong Disyembre 2024 sa pito ka Chinese nationals tungod sa giingong operasyon sa online scam sa Parañaque City. Gipasakaan og kaso ang mga suspek ubos sa mga probisyon sa social engineering scheme nga gipaila pinaagi sa AFASA.

Ubos sa balaod, gitugotan ang BSP sa pagsusi sa mga account sa panalapi nga gidudahang nalambigit sa mga operasyon sa scam bisan walay una nga court order.

Ang impormasyon nga makuha pinaagi sa maong mga pagsusi sa BSP mahimong direktang ipaambit sa mga ahensyang nagpatuman sa balaod, aron mapadali ang pagsubay sa salapi, mapalig-on ang mga dokumento sa kaso, ug madugangan ang kahigayonan sa mga biktima nga mabawi ang gikawat nga kuwarta.

Midugang si Figueroa nga nakahimo ang CAPO og pormal nga mga kasabutan sa pagpaambit og impormasyon uban sa importanteng mga ahensyang nagdumala ug nagpatuman sa balaod—lakip ang Securities and Exchange Commission, Department of Justice, ug Cybercrime Investigation and Coordinating Center—aron mas hapsay ang hiniusang operasyon sa nagkalainlaing ahensya.

Gidawat ni Villar ang mga update ug gipasiugda nga ang unang mga numero nagpakita sa kaepektibo sa balaod.

“Malinaw sa mga datos na may konkretong resulta ang AFASA. Mas napapalakas nito ang imbestigasyon at paghahain ng mga kaso, habang mas tumataas ang posibilidad na mabawi ng mga biktima ang perang nawala sa kanila,” matod ni Villar.

Gipamatud-an usab niya ang pasalig sa Senado nga suportahan ang dugang nga mga lakang aron mapanalipdan ang publiko batok sa pagpanglimbong sa panalapi pinaagi sa internet.

“Nakakatuwang makita na mas marami nang scammers ang natutukoy at napapanagot dahil sa AFASA. Makakaasa ang BSP at iba pang ahensya na handang tumulong ang Senado kung kinakailangan pang palakasin ang ating mga batas upang higit na maprotektahan ang publiko laban sa mga financial scam,” pagtapos ni Villar. -Ato ni Bai