1.1M ka trabahante sa Metro Manila makadawat og P60 nga pagtaas sa sweldo

Makadawat og PHP60 nga pagtaas sa adlawang sweldo ang minimum wage earners sa National Capital Region (NCR) sugod Setyembre 26.

Gipahayag sa Department of Labor and Employment (DOLE) sa usa ka news release nga ang Wage Order NCR-28, nga gipatik niadtong Biyernes ug mahimong epektibo human sa 15 ka adlaw, mopataas sa minimum wage sa non-agricultural workers gikan sa PHP695 ngadto sa PHP755 ug sa agricultural workers gikan sa PHP658 ngadto sa PHP718.

Giisyu sa Regional Tripartite Wages and Productivity Board - NCR ang wage order human masunod ang gitakdang tripartite wage-setting process.

Gipahinumdoman sa DOLE ang mga employer nga sundon ang bag-ong wage rates sa dihang mahimong epektibo na kini. Gipasaligan usab niini ang mga trabahante nga bantayan sa departamento ang pagpatuman sa bag-ong wage rates.

Gilaum nga makabenepisyo sa pagtaas sa sweldo ang gibanabanang 1.1 milyon ka daily wage earners sa Metro Manila, base sa datos sa DOLE.

Ang pagtaas sa sweldo nagpakita sa paningkamot ni President Ferdinand R. Marcos Jr. nga mapalambo ang purchasing power sa mga trabahante ug mapauswag ang inclusive economic growth.

-Ato ni Bai