₱50M gigahin sa gobyerno para sa industriya sa kape sa Bukidnon

Gigahin sa gobyerno ang ₱50 milyon aron suportahan ang pagpalambo sa industriya sa kape sa Bukidnon, matod ni Executive Secretary Ralph Recto niadtong Martes.

Sa usa ka pahayag, miingon si Recto nga ipagawas ang pondo pinaagi sa Local Government Support Fund (LGSF), human sa iyang bag-ohay nga pakigpulong sa mga lokal ug Indigenous nga mag-uuma og kape sa probinsya.

“Agad na tumugon si Pangulong Ferdinand R. Marcos Jr. sa pangangailangan ng ating coffee farmers. Ang bilin ng Pangulo ay suportahan natin sila mula punla hanggang merkado upang lumaki ang kanilang ani at kita,” matod ni Recto.

Gamita ang pondo sa LGSF sa pagpalit og specialty coffee seedlings, mga kinahanglanon sa pagpananom sama sa parchment ug chicken manure, ug mga materyales sa paghimo og nurseries, lakip ang nets, plastic bags, hoses ug plastic drums, sumala ni Recto.

Kabahin ang maong tabang sa mas lapad nga paningkamot sa administrasyon nga mapalig-on ang industriya sa kape sa nasud. Gisugyot usab nga hatagan og ₱400.54 milyon ang Department of Agriculture ubos sa 2027 National Expenditure Program alang sa pagpalambo sa industriya sa kape.

“President Marcos is building a stronger Philippine coffee industry from the ground up. By investing in seedlings, nurseries, farm inputs, and market access, we can reduce imports, raise farmers’ incomes, and make Philippine coffee more competitive abroad,” matod ni Recto.

Atol sa iyang pagbisita sa Bukidnon niadtong Setyembre 4, nakigkita si Recto, kauban si Sen. Juan Miguel Zubiri ug mga lokal nga opisyal, sa mga mag-uuma og kape, lakip ang Indigenous farmers, sa municipal farm sa Barangay Salawagan sa Quezon.

Miingon siya nga adunay dakong potensyal ang Bukidnon nga mahimong usa sa mga nag-unang probinsya nga tiggama og kape tungod sa yuta, klima ug kugihan nga mga mag-uuma niini.

“Bukidnon has the land, climate, and hardworking farmers needed to become a major coffee-producing province. The government will help provide the investments and infrastructure necessary to turn that potential into better livelihoods and a globally competitive industry,” matod niya.

Tumong sa Bukidnon nga madugangan og 200 porsyento ang produksyon sa kape pinaagi sa pagtanom og Arabica coffee sa 10,000 ka ektarya nga yuta ug pagkab-ot sa aberids nga ani nga usa ka kilo nga coffee beans matag punoan.

Tumong usab sa probinsya nga maka-export og high-quality specialty coffee sulod sa sunod nga 10 ka tuig pinaagi sa pagpaayo sa pamaagi sa pagpananom, pagpalapad sa merkado, ug paghimo og lig-on ug kasaligan nga sistema gikan sa produksyon hangtod sa pagproseso ug manufacturing.

Aron makab-ot kini, plano sa provincial government nga magtukod og nurseries sa mga local government units niini, lakip ang duha ka pasilidad sa Barangay Kibenton sa Impasugong ug Barangay Bangcud sa Malaybalay City.

Tabangan usab niini ang mga farmer cooperatives ug associations sa pagtukod o pagpaayo sa mga nursery sa Talakag, Impasugong, Lantapan, Valencia City ug Pangantucan.

Miingon si Recto nga magpadayon ang national government sa pakigtambayayong sa mga lokal nga gobyerno sa Bukidnon aron matubag ang kakulang sa imprastraktura, lakip ang farm-to-market roads, aron mas sayon madala sa mga mag-uuma ang ilang produkto ngadto sa merkado.

Suporta sa Edukasyon

Gipasiugda usab ni Recto ang tabang sa gobyerno alang sa graduating college students pinaagi sa Presidential Scholars Program atol sa iyang bag-ohay nga pakigkita sa 155 ka scholars gikan sa 31 ka barangay sa Quezon.

Ang 155 ka Presidential Scholars sa Quezon nagrepresentar sa lima ka benepisyaryo gikan sa matag usa sa 31 ka barangay sa lungsod ug kabahin sa 2,320 ka benepisyaryo nga napili sa tibuok Bukidnon.

Makadawat og kinatibuk-ang ₱46.4 milyon ang 2,320 ka graduating college students sa Bukidnon, diin matag scholar makadawat og ₱20,000 aron makatabang sa tuition balance, transportasyon, learning materials ug uban pang gasto sa eskwelahan hangtod sa graduation.

“Hindi dapat mapurnada ang ilang taong pagsisikap dahil lamang kapos ang pamilya sa panghuling gastos. Ang tulong na ito ay tulay patungo sa graduation at sa mas magandang buhay para sa kanilang pamilya,” matod ni Recto.

Gilaum nga kapin 200,000 ka graduating students gikan sa mga 42,000 ka barangay sa tibuok nasud ang makabenepisyo sa Presidential Scholars Program.

Ubos sa programa, matag barangay hatagan og ₱100,000 aron suportahan ang lima ka college students, diin matag usa makadawat og ₱20,000.

Kabahin ang Presidential Scholars Program sa mas lapad nga education agenda sa Marcos administration, kauban ang free tuition sa state ug local universities, gipalapad nga tertiary education subsidies, merit scholarships, technical-vocational training ug gipalig-on nga senior high school work-immersion programs.

Gilunsad usab sa administrasyon ang Bagong Pilipinas Merit-Based Scholarship Program, nga target makahatag og scholarship sa 20,000 ka estudyante alang sa School Year 2026–2027, ug ang Project PEPA, nga magkonektar sa mga 490,000 ka senior high school graduates gikan sa Pantawid Pamilyang Pilipino Program households ngadto sa government-funded tertiary education opportunities.

-Ato Ni Bai