North Korea Magpadala og Mga 100 ka Atleta sa Asian Games sa Japan

Magpadala ang North Korea og mga 100 ka atleta nga mosalmot sa 14 ka matang sa sports sa Asian Games sa Japan sa ulahing bahin ning tuiga, sumala sa secretary general sa Olympic Committee sa nasod nga nakigsulti sa usa ka mantalaan nga nakabase sa Tokyo.

Kanunay nga tensiyonado ang relasyon sa North Korea ug Japan, ug nakahukom ang North Korea nga dili magpadala og team sa Tokyo Summer Olympics niadtong 2021 tungod sa krisis sa panglawas sa tibuok kalibotan.

Mas gamay ang team kumpara sa delegasyon nga 185 ka atleta sa 18 ka matang sa sports nga misalmot sa miaging Asiad sa Hangzhou niadtong 2023, diin nakadaog sila og 11 ka gold, 18 ka silver ug 10 ka bronze medals.

Sumala sa Korean media, gisultihan ni Ko Chol Ho ang Choson Sinbo newspaper nga naglaum siyang makadaog og mas daghang medalya ang mas gamay nga team kumpara tulo ka tuig ang milabay.

Hugot nga gilimitahan sa Pyongyang ang pagsalmot sa mga atleta niini sa mga kompetisyon sa gawas sa nasod panahon sa pandemya ug, tungod niini, wala usab makasalmot ang North Korea sa 2022 ug 2026 Winter Olympics.

Kapin 11,000 ka atleta gikan sa 45 ka nasod ang gilaum nga mosalmot sa 20th Asian Games sa Nagoya ug ubang mga siyudad sa Aichi prefecture sa Japan gikan Septiyembre 19 hangtod Oktubre 4. -Ato ni Bai