NBA: Stephen Curry, miuyon sa $116M nga kontrata sa Warriors

Nagkasabot ang Golden State Warriors ug si Stephen Curry sa duha ka tuig nga pagpalugway sa kontrata nga nagkantidad og $116 million, sumala sa ESPN niadtong Biyernes sa gabii.

Sumala sa balita, ang kasabotan naglakip sa player option alang sa 2028-29 season.

Gibalita usab sa ESPN nga modawat si Curry og $20 million nga mas ubos sa kinatas-ang kantidad nga mahimo niyang makuha aron mahatagan ang Warriors og dugang salary-cap space alang sa sunod nga offseason. Sumala sa balita, naghisgot si Curry ug ang team sa nagkalain-laing posibilidad sa kontrata sukad nahimo siyang kwalipikado sa duha ka tuig nga maximum deal nga nagkantidad og $136.7 million niadtong Agosto.

Kung moduwa si Curry hangtod sa 2028-29 season, kini ang iyang ika-20 nga season sa NBA, nga tanan niyang gigugol uban sa Warriors.

Limitado lamang sa 43 ka duwa ang 38-anyos nga si Curry sa miaging season, tungod kay daghang duwa ang iyang wala maduwaan gumikan sa padayong injury sa tuhod. Bisan pa niini, nakarekord siya og average nga 26.6 puntos, 4.4 ka nasulod nga 3-pointer ug 11.3 ka 3-point attempt matag duwa, nga tanan mas taas sa iyang career averages.

Si Curry, nga 12 ka higayon nang napili isip All-Star ug napili isip ikapito sa kinatibuk-ang NBA draft gikan sa Davidson niadtong 2009, adunay duha ka scoring title, duha ka MVP award, usa ka Finals MVP award ug upat ka NBA championship. Apan nahuman sa Warriors ang miaging season nga adunay 37 ka daog ug 45 ka pildi, ang ilang pinakadaot nga rekord sa usa ka season nga wala gipamubo sukad sa ilang 36-46 nga rekord niadtong 2010-11.

Sayo ning semanaha, gipahayag ni Curry nga dili siya gusto og drama sa mga panaghisgot bahin sa kontrata, ilabina nga magsugod na ang training camp sa sunod Martes.

"The idea of getting back to work is exciting," matod ni Curry niadtong Miyerkules. "I feel like I've taken advantage of the offseason. I feel like there's no hesitation about where I'm at physically going in. ... But I'm excited about getting back to work."

Adunay career averages si Curry nga 24.8 puntos, 4.0 ka nasulod nga 3-pointer ug 9.4 ka 3-point attempt matag duwa. Ang kataposang duha ka numero maoy mga rekord sa NBA, lakip usab ang iyang career free-throw percentage nga .912.

Siya usab ang naghupot sa NBA career records sa kinatibuk-ang 3-pointers nga nasulod (4,248) ug gisulayan (10,073).

-Ato ni Bai