Jaja Santiago, balik-Pilipinas aron manguna sa Creamline sa PVL On Tour

Atubangon sa Creamline ang Galeries Tower samtang tapuson sa Premier Volleyball League (PVL) ang unom ka semana nga On Tour Showdown sa Victorias City Coliseum sa Negros Occidental karong Sabado.

Mahatagan og dakong pagtagad sa alas-6:30 sa gabii nga duwa ang pagbalik sa kanhi league ace nga si Sachi Minowa, nga mas nailhan sa Filipino fans isip Jaja Santiago.

Sugdan sa kanhi Chery Tiggo star ang iyang pagduwa alang sa Creamline sa dili pa ang umaabot nga PVL Invitational Conference.

Usa kini ka bag-ong importante nga yugto sa karera sa 6-foot-5 middle blocker, nga nanguna sa Chery Tiggo sa pagkadaog sa 2021 PVL Open Conference championship sa wala pa mibalhin sa Japan, diin nagduwa siya sulod sa pipila ka season ug sa ulahi nahimong Japanese citizen.

Nakasulay na si Minowa sa pagduwa alang sa Creamline sa bag-ohay nga friendly match batok sa Choco Mucho sa Cagayan de Oro.

“It’s really good to be back. I really missed things like this here in the Philippines. So I’m very happy and excited to play here again,” matod ni Minowa sa usa ka news release niadtong Biyernes.

Dili lamang pagbalik sa court atubangan sa Filipino fans ang kahulogan sa iyang comeback. Nalipay usab siya sa kahigayonan nga makaduwa uban sa mga nailhang stars sa Creamline samtang makakat-on gikan sa bag-ong henerasyon sa mga players.

“It’s overwhelming because there are so many talented players in Creamline and there are so many kids. I’m really excited to learn from the young players and, of course, from the veterans of Creamline,” matod niya.

Mouban si Minowa sa lig-on nga Creamline lineup nga pangunahan nila Alyssa Valdez, Michele Gumabao ug Jema Galanza, samtang gilauman usab nga adunay dakong papel sila Lorie Bernardo ug bag-ong miyembro nga si Ishie Lalongisip.

Gikatakdang ipadayon ni Minowa ang iyang professional career sa United States human sa Invitational Conference.

Pangunahan sa Bacolod native nga si Erika Deloria, Jean Asis, Roselle Baliton ug Jade Gentapa ang Galeries Tower, samtang magdala og kasinatian ug kalma sa duwa ang veterans nga sila Aiza Maizo, Camille Victoria ug Lycha Ebon.

Samtang, mag-atubang ang Capital1 ug Farm Fresh alas-4 sa hapon.

Gidala sa unom ka semana nga inisyatiba, nga giorganisar sa Sports Vision, ang liga ug mga stars niini ngadto sa mga lugar gawas sa naandang volleyball centers, pinaagi sa pagpahigayon og mga duwa sa Isabela, Batangas, Ilocos Sur, South Cotabato ug Lanao del Norte sa wala pa ang finale sa Negros Occidental.