FIGURE SKATING: Japan champions Miura, Kihara, magpakasal

Gipahibalo ni Japanese ice-skating champions Riku Miura ug Ryuichi Kihara niadtong Domingo ang ilang engagement, nga naghimo kanila nga magtiayon dili lamang sa ice kondili usab sa personal nga kinabuhi, human nilang makuha ang kasingkasing sa daghang Japanese sa usa ka nasod diin ang skating kanunay nga nag-una sa mga balita.

“We’re engaged,” ilang gi-post sa Instagram uban sa litrato ni Kihara nga nagluhod sa ice aron ihatag kang Miura ang singsing. “Through both the happy times and the difficult ones, we’ve shared so many moments together, supporting each other every step of the way.”

Nailhan isip “Riku-Ryu”, si Miura, 24, ug Kihara, nga nag-34 anyos niadtong Sabado, nahimong unang Japanese pair nga nakadaog og Olympic gold sa figure skating sa Milano Cortina Winter Games niadtong Pebrero.

Nailhan sa ilang kanunay nga pagpahiyom, pagkatawa ug paggakos — diin usahay kargahon ni Kihara ang 146-cm (4-foot-nine-inch) nga si Miura pagsulod ug paggawas sa ice — nasinati sa duha ang lisod ug malipayong mga panahon sukad nahimo silang pares niadtong 2019 hangtod sa ilang pagpahibalo sa pagretiro gikan sa competitive skating niadtong Abril.

Nakaagwanta sila sa daghang tuig nga mga kalisdanan, diin balik-balik nga naglisod si Kihara tungod sa mga injury sa likod, samtang padayon usab nga nakigkompetensya si Miura bisan sa iyang chronic nga dislocated shoulder.

Ang ilang labing mahinumdumang kalampusan mao ang ilang performance sa Milan, nga nagpakita sa mga tema sa pakigbisog, paglahutay ug kadaugan.

Nahulog sila sa ikalimang puwesto tungod sa usa ka dili kasagarang sayop sa wala pa mibawi pinaagi sa usa ka makapadani nga free programme, diin nangatindog na ang mga tumatan-aw dugay pa sa wala mahuman ang katapusang mga nota sa musika gikan sa “Gladiator.”

Nakuha nila ang gold ug world-record score. Si Kihara, nga miingon nga “felt completely devastated” human sa kapakyasan, dihadiha mihilak — sa mga hulagway nga balik-balik nga gipakita sa Japanese television.

Sa paglabay sa panahon, ang duha “became irreplaceable parts of each other’s lives,” matod nila sa ilang post niadtong Domingo, nga nakakuha og kapin sa 14,000 ka congratulatory messages sulod sa lima ka oras.