BOXING: Mga tiket sa away nila Joshua ug Fury, nahurot sulod sa usa ka oras

Nahurot sulod lang sa usa ka oras ang mga tiket alang sa dugay nang gipaabot nga heavyweight boxing match nila Tyson Fury ug Anthony Joshua sa Principality Stadium sa Cardiff human kini gisugdan og baligya niadtong Biyernes, sumala sa mga taho sa British media.

Nakakuha og dakong interes ang away sa duha ka British boxers, nga gipahibalo niadtong miaging bulan ug gihulagway nga labing dakong boxing match sa kasaysayan sa Britain.

Gibaligya ang dul-an sa 80,000 ka tiket sugod sa udto, nga adunay presyo gikan sa £88.50 ($117) hangtod £13,128 ($17,357), lakip na ang booking fees, sumala sa BBC.

Gikatahong kapin sa 500,000 ka fans ang naghulat sa online queue pipila lang ka minuto human nagsugod ang pagbaligya sa mga tiket.

Gikatakdang manguna sila Fury ug Joshua sa boxing event sa Disyembre 11, bisan og gilaoman nga magsugod ang ilang pagsulod sa boxing ring sa mga alas 1 sa kadlawon sa Disyembre 12.

Sumala sa aplikasyon nga gisumite ngadto sa Cardiff City Council, magpabiling bukas ang Principality Stadium hangtod alas 3:30 sa kadlawon sa Disyembre 12.

I-broadcast sa Netflix ang away sa duha ka kanhing world champions. Sa sinugdan, gilaoman ni Saudi financier Turki Alalshikh nga mahimo ang maong away sa Madison Square Garden sa New York.

Kini ang unang higayon nga mag-atubang sa boxing ring ang duha ka kanhing world heavyweight champions, nga motapos sa daghang tuig nga mga pangagpas bahin sa ilang posible nga away, nga gikabalak-an sa kadaghanan nga basin dili na mahitabo.

($1 = 0.7564 pounds)

-Ato ni Bai