BOXING: Kanhi world champion Tete, gipusil patay gawas sa iyang balay sa South Africa

Gipusil patay ang kanhi world boxing champion nga si Zolani “Last Born” Tete gawas sa iyang balay sa Eastern Cape province sa South Africa niadtong Biyernes, sumala sa kapulisan ug sports minister sa nasod.

Miabot ang 38-anyos sa iyang pinuy-anan sa Mdantsane township dihang duha ka armadong lalaki nga nagsul-ob og balaclava ang mikanaog gikan sa usa ka sakyanan ug nagpamusil.

“I will not speculate about who did this or why,” matod ni Sports Minister Gayton McKenzie sa usa ka pahayag.

Gilaum nga ang pagpatay kang Tete makapukaw pag-usab sa pagtagad sa bangis nga krimen sa South Africa, nga nagpabiling usa sa mga nasod nga adunay labing taas nga gidaghanon sa pagpatay sa kalibotan bisan pa sa bag-ohay nga pagkunhod sa mga kaso sa homicide.

Dako usab ang epekto sa pagpatay sa world champion sa Mdantsane, usa ka township sa Eastern Cape nga gigikanan sa pipila sa labing malampusong mga boksingero sa South Africa.

Gipusil usab sa makadaghang higayon ang 27-anyos nga babaye nga kauban ni Tete ug gidala sa ospital. Gisugdan na sa kapulisan ang imbestigasyon samtang wala pa matino ang motibo.

Nakuha ni Tete ang IBF junior-bantamweight world title niadtong 2014 human niya mapildi ang Japanese boxer nga si Teiru Kinoshita sa Kobe. Sa ulahi, nakuha usab niya ang WBO bantamweight crown.

Labing nailhan si Tete sa tibuok kalibotan tungod sa iyang 11-segundos nga knockout batok sa isig-South African nga si Siboniso Gonya sa Belfast niadtong Nobyembre 2017, ang labing paspas nga paghunong sa usa ka world title fight. -Ato ni Bai