ASIAN GAMES: South Korea Men’s Basketball Team Wala Kaensayo Tungod sa Wala Miabot nga Bus

Wala makaapil sa gaan nga practice session ang South Korean men’s basketball team niadtong Domingo, pipila ka oras sa wala pa sila moatubang sa host Japan sa Asian Games final, human wala miabot ang ilang shuttle bus, sumala sa news agency nga Yonhap.

Ang bus, nga gikatakdang moabot sa team hotel sa Nagoya alas 10 sa buntag, wala miabot, matod sa team officials sa South Korean news agency, ug miingon sila nga wala silay nadawat nga pasabot.

Nagtinguha ang South Korea nga makuha ang ilang unang men’s basketball gold sa Asian Games sukad 2014 ug gikatakda unta nga adunay shoot-around session sa practice gym sa buntag sa wala pa ang final, nga magsugod alas 7:40 sa gabii (1040 GMT) sa Aichi International Arena.

Miingon ang Korean Sport & Olympic Committee sa Yonhap nga plano niini nga magsang-at og reklamo ngadto sa Asian Games organizing committee ug Olympic Council of Asia.

Sa dihang gipangayoan og komento, wala mikomento ang organizers bahin sa insidente apan miingon sa Reuters pinaagi sa email: “We are working to arrange appropriate transportation services for all athletes, coaches, and event staff to ensure that the competition is not affected.”

Daghang mga problema sa pag-organisa ang nakaapekto sa Aichi-Nagoya Games, lakip ang mga problema sa accommodation ug transportasyon.

Nakaatubang og mga pagkalangan ang soccer team sa South Korea ug nadala sila sa sayop nga stadium, samtang natingala ang hockey players sa nasod sa dihang nasayop og patukar ang anthem sa ilang karibal nga North Korea atol sa pre-match ceremony. -Ato ni Bai