Aquino Nagduso nga Pasidunggan sa Senado ang mga Atletang Pilipino sa Asian Games

Giduso ni Senator Bam Aquino nga pasidunggan sa Senado ang 447 ka miyembro sa delegasyon sa Pilipinas nga nakakuha sa pinakadaghang medalya sa nasod sa Asian Games sulod sa unom ka dekada.

Gipahibalo ni Aquino niadtong Martes nga misumite siya sa Senate Resolution 702 aron pahalipayan ug pasidunggan ang mga atletang Pilipino nga miapil sa 20th Asian Games sa Aichi-Nagoya, Japan, diin nakadaog ang Pilipinas og 29 ka medalya — upat ka bulawan, siyam ka plata ug 16 ka bronse.

Milabaw kini sa 18 ka medalya nga nakuha sa Pilipinas sa miaging Asian Games ug mao ang pinakadaghan sukad nakakuha ang nasod og 42 ka medalya sa 1966 Asian Games sa Bangkok.

“With the valiant effort of our Filipino athletes in their respective events, the Philippines delivered an impressive performance,” matod ni Aquino.

Nakuha ni Carlos Edriel Yulo ang duha sa upat ka bulawang medalya human modaog sa men's vault ug floor exercise sa artistic gymnastics.

Nadaog usab ni Ernest John “EJ” Obiena ang bulawang medalya sa men's pole vault, samtang nakuha ni Jesus Gabriel Derick Yape ang kampiyonato sa mixed individual virtual taekwondo.

Nakadaog usab og mga medalya ang Pilipinas sa boxing, basketball, sepak takraw, archery, taekwondo, jiu-jitsu, karate, weightlifting, athletics, esports, surfing, tennis, ug beach volleyball.

Matod ni Aquino, ang maong kalampusan dili lamang resulta sa maayong pasundayag sa mga atletang nakadaog og medalya, kondili usab sa paningkamot sa mga coach, tigbansay ug mga kawani nga misuporta sa delegasyon sa Pilipinas.

“The achievements of the Philippine delegation reflect not only the individual excellence and determination of its medalists but also the collective efforts of all Filipino athletes, coaches, trainers, and support personnel who have worked to represent the country with distinction,” matod niya.

Gawas sa pagpasidungog sa delegasyon, gipasiugda ni Aquino nga ang maong kalampusan nagpakita sa kamahinungdanon sa padayong paggahin og pondo alang sa pagpalambo sa mga dula sa lokal nga mga komunidad, pagbansay sa mga atleta ug coach, pagpaayo sa mga pasilidad, ug mga programa sa pagsuporta sa mga atleta.

Matod niya, ang pagpalig-on sa mga programa sa pagpalambo sa mga atleta makahatag og dugang kahigayonan sa mga Pilipino nga madiskobrehan ug mapalambo ang ilang abilidad aron sa umaabot makarepresentar sa nasod sa internasyonal nga mga kompetisyon. -Ato ni Bai