‘Last Dance’ Jersey ni Michael Jordan Nabligya sa Rekord nga $12.26 Milyon

Nabligya sa $12.26 milyon niadtong Martes ang jersey ni Michael Jordan gikan sa Game 3 sa 1998 NBA Finals, nga nakabuak sa rekord sa labing mahal nga memorabilia ni Jordan.

Gisul-ob ni Jordan ang maong jersey atol sa iyang ikaunom ug kataposang NBA Championship season sa iyang “Last Dance” nga kataposang kampanya uban sa Bulls. Gibaligya kini sa negosyanteng si Ryan Gough pinaagi sa Joopiter, ang digital auction house ni Pharrell Williams.

Nabuak niini ang miaging rekord sa memorabilia ni Jordan nga $10.091 milyon alang sa jersey nga iyang gisul-ob sa Game 1 sa samang Finals.

“Few objects in the history of sport embody greatness as completely as Michael Jordan’s Game 3 jersey from the 1998 NBA Finals,” matod sa Joopiter sa online auction posting alang sa jersey, nga gibanabanang mabaligya tali sa $10 milyon ug $15 milyon. “Worn during The Last Dance … it marks the culmination of an era that transformed basketball into a global cultural phenomenon. Today, it stands among the most important game-worn sports artifacts ever to come to market.”

Bisan rekord kini alang kang Jordan, kapin gamay ra sa katunga ang kantidad niini kumpara sa labing mahal nga memorabilia nga gisul-ob sa usa ka atleta atol sa duwa nga nabaligya sa subasta. Ang maong rekord gihuptan sa jersey nga gisul-ob ni Babe Ruth sa 1932 World Series sa dihang iyang gitagna kon asa niya maigo ang bola, nga nabaligya sa $24.12 milyon niadtong 2024.

-Ato ni Bai